O Grupo de Investigación Comunicación Persuasiva (CP2), creado en 2007 na Universidade de Vigo, desenvolve a súa actividade a través de proxectos competitivos e iniciativas de transferencia de coñecemento para contribuír á comprensión dos fenómenos comunicativos contemporáneos e á súa aplicación práctica en distintos sectores da sociedade.

Integrado no Programa de Consolidación e Estruturación de Unidades de Investigación Competitivas da Xunta de Galicia, CP2 persegue a súa consolidación como unha unidade de referencia pola súa produción científica e actividade de I+D, tanto a nivel nacional como internacional.

O Grupo CP2 desenvolve a súa actividade arredor de cinco liñas de investigación que analizan os procesos, estratexias e efectos da comunicación persuasiva en distintos ámbitos sociais, institucionais e mediáticos: 

• A liña de Creatividade e Publicidade, coordinada pola profesora Montse Vázquez Gestal, céntrase no estudo das estratexias publicitarias e dos procesos creativos aplicados á comunicación de empresas e institucións. O grupo analiza campañas e accións comunicativas desde unha perspectiva tanto aplicada como teórica, elaborando informes e propostas de mellora, ao tempo que contribúe á reflexión académica sobre o papel da creatividade e as súas conexións con outras áreas de coñecemento. Esta liña integra tamén investigacións sobre publicidade, ética e valores.
• A liña de Comunicación Política, coordinada polo profesor Xosé Rúas Araújo, aborda o estudo da comunicación política, a comunicación emocional, a neurocomunicación e os procesos de verificación informativa e loita contra a desinformación. Neste ámbito, o grupo desenvolveu proxectos de investigación de referencia financiados pola Axencia Estatal de Investigación, como DEBATrue e FAKELocal, que sustentan unha destacada produción científica relacionada coa alfabetización mediática, o fact-checking e a análise dos efectos da desinformación nos sistemas democráticos.
• A liña de Relacións Públicas e Comunicación Organizacional, coordinada pola profesora Ana Belén Fernández Souto, atende os procesos de comunicación en organizacións públicas e privadas, a comunicación institucional, turística e corporativa, así como o protocolo, o cerimonial e a organización de eventos. O grupo desenvolve tamén investigación sobre comunicación e deporte, ámbito no que liderou proxectos competitivos de ámbito estatal relacionados co impacto da pandemia da COVID-19 na xestión comunicativa das federacións deportivas españolas.
• De maneira transversal, CP2 impulsa investigacións sobre xénero, diversidade e idadismo, así como sobre os desafíos da comunicación dixital, os novos formatos narrativos e os procesos de innovación televisiva. Neste contexto, destaca a creación da primeira Cátedra de Idadismo de Europa, promovida en colaboración coa Universidade de Vigo, AFAGA e Atendo, que se converteu nun referente internacional na investigación sobre discriminación por idade, e a Cátedra CIRCOM-UVigo Chair, desenvolta en colaboración con CIRCOM Regional, que promove a investigación sobre a innovación televisiva e a adaptación das televisións rexionais ao contorno dixital, consolidando a CP2 como un referente internacional neste eido.